المهم تيحكي لي شخص من العائلة أنو كان في شارع الجيش الملكي في قلب الدار البيضاء تيتسنى الطاكسي...
و بانْ لو صديق حميم ديالو راكب فالسيارة داز منْ حْداه ... فْرَحْ وقال نعيَّطْ لو فالبورطابل ونتكلَّم معاه ونْسَوَّلْ فيه وعلاش لَّا نتقهواوْ بجوج ....
- آلو سِّي أحمد آش اخبارك ؟ وفين شادْها ؟
- أهلا لاباس الحمد لله ، أنا في مراكش تندور فجامع لفناء!!!
صاحِبُنا بقى حالْ فمُّو هههه آويلي على كذبة باينة ههه
واش هذا اللي داز من قدامي ونفس السيارة والماتريكول
آويلي راه هو بلحمه وشحمه
- وكيف داير الجو آصاحبي فمراكش؟
- الحرارة ..... المُوت ديال الصَّهضْ !!!!!!!
- سبحان الله حتى أنا فجامع لفناء ، هي نتلاقاو دابا نيتْ ...
واجاوبني آصاحبي ...واسِّــي أحمــد واصـاحبــي .. واعشيري !!
لا مجــيب ، لا حياة لمن تنادي !!!
" اتصالات المغرب ترحِّب بكم ، يتعذر ...."
ربي واش ماشي مرgة وشوهة تَكْذَبْ وتَحْصَل و تكون في موقف لا تُحسَدُ عليه ؟؟
علاش تنكذبو وعلى مَن ولاشْ ؟
آش تنربحو من بحال هاد الكذبة الباينة ؟!
أحيانا تنكذبو باش نحافظو على مشاعر الشخص الآخر ، أو نكذبو باش مانجرحوهش ، وتنقلبو كيفاش مانحصلوش ..ولكن باش نكذبو هاكدا غير باش نكذبو وصافي ونحصلو حصْلة ونتشوهو !!!!
وكاينين شي ناس تيكذبو و ينساو
وكيفما تيقولو
-خللي الكذاب حتَّى ينسى وسَولو ههههه "
اليوم يقول ليك كلمة أو ثمن وفي الغد ينسى اللي قالو هههه
مافهمتش علاش ؟
تنخسرو السمعة ديالنا و الناس مايبقاوش يتيقو فينا..
هاد شي تنقولو ليكم باش تستهلكو بلا ما تتهلكو
والله يسامح لينا
تقبلوا موضوعي مع مودتي واحتراماتي